Kitobxonlik – taraqqiyot va ma’naviyat poydevor.

Denov tadbirkorlik va pedagogika instituti.O’zbek tili va adabiyot kafedrasi o’qtuvchisi Saitova Nilufar.

Denov tadbirkorlik va pedagogika institutu.Filologiya fakulteti.3- bosqich talabalari Xo’janazarova E’zoza va Abdumurodova Rayxona.

     Bugungi kunda dunyo misli ko‘rilmagan sur’atlarda rivojlanmoqda. Axborot texnologiyalarining taraqqiy etishi, internet tarmog‘ining keng ommalashuvi va raqamli vositalarning hayotimizga chuqur kirib borishi insonlardan doimiy ravishda o‘z ustida ishlashni, bilim va ko‘nikmalarini yangilab borishni talab qilmoqda. Bunday sharoitda kitob mutolaasi nafaqat bilim manbai, balki insonning ma’naviy kamoloti, intellektual salohiyati va shaxsiy rivojlanishining muhim omiliga aylanmoqda. Kitob insoniyat yaratgan eng buyuk ma’naviy boyliklardan biridir. Asrlar davomida to‘plangan ilmiy, tarixiy va badiiy meros kitoblar orqali avloddan avlodga yetib kelgan. Har bir kitob o‘zida muayyan davrning tafakkuri, madaniyati va hayotiy tajribasini mujassam etadi. Shu sababli kitob o‘qigan inson nafaqat yangi ma’lumotlarga ega bo‘ladi, balki hayotni chuqurroq anglash, voqealarni tahlil qilish va mustaqil fikrlash qobiliyatini ham rivojlantiradi.

    Yoshlar tarbiyasida kitobning o‘rni alohida ahamiyatga ega. Mutolaa jarayonida insonning dunyoqarashi kengayadi, nutq madaniyati shakllanadi va ma’naviy olami boyiydi. Ayniqsa, talabalik davrida kitob bilan do‘st tutingan yoshlar kelajakda o‘z sohasining yetuk mutaxassisi bo‘lib yetishadi. Chunki har qanday kasbiy muvaffaqiyatning asosi chuqur bilim va keng fikrlash doirasiga bog‘liqdir. Afsuski, bugungi kunda ayrim yoshlar bo‘sh vaqtlarining katta qismini ijtimoiy tarmoqlar va ko‘ngilochar platformalarda o‘tkazmoqda. Albatta, zamonaviy texnologiyalar hayotimizning ajralmas qismi hisoblanadi. Biroq ulardan oqilona foydalanish muhimdir. Vaqtni faqat virtual olamda o‘tkazish insonning kitob mutolaasiga bo‘lgan qiziqishini susaytirishi, natijada bilim olish jarayoniga salbiy ta’sir ko‘rsatishi mumkin. Shu bois yoshlar o‘z vaqtini to‘g‘ri taqsimlashi, internet va kitob o‘rtasida muvozanatni saqlashi zarur. Mamlakatimizda ham kitobxonlik madaniyatini rivojlantirishga alohida e’tibor qaratilmoqda. Kutubxonalar faoliyatining takomillashtirilishi, elektron kutubxonalar sonining ortishi, kitob yarmarkalarining tashkil etilishi va yoshlarni mutolaaga jalb etishga qaratilgan turli loyihalar buning yaqqol dalilidir. Bunday sa’y-harakatlar yosh avlodning ma’naviy va intellektual salohiyatini yuksaltirishga xizmat qilmoqda. Kitob o‘qish insonni sabr-toqatli, izlanuvchan va maqsad sari intiluvchan etib tarbiyalaydi. Buyuk allomalar, olimlar va adiblarning hayot yo‘liga nazar tashlaydigan bo‘lsak, ularning barchasi kitobni o‘zlarining eng yaqin hamrohi deb bilganlarini ko‘ramiz. Darhaqiqat, kitob insonni jaholatdan ma’rifatga, oddiy kuzatuvchidan faol fikrlovchi shaxsga aylantiradigan qudratli vositadir.

     Xulosa qilib aytganda, kitobxonlik jamiyat taraqqiyotining muhim omillaridan biridir. Bilimli, ma’naviy yetuk va raqobatbardosh kadrlarni tarbiyalashda kitobning o‘rni beqiyosdir. Har bir talaba va yosh mutaxassis mutolaani kundalik hayotining ajralmas qismiga aylantirsa, nafaqat o‘zining, balki jamiyatning ham ravnaqiga munosib hissa qo‘shadi. Zero, kitobga oshno xalqning kelajagi hamisha porloq bo‘ladi.

Previous post Internet davrida adabiyotning o‘rni
Next post «KELIN SALOM «JANRINING O‘ZIGA XOS XUSUSIYATLARI.

Добавить комментарий

Ваш адрес email не будет опубликован. Обязательные поля помечены *