Denov tadbirkorlik va pedagogika instituti – bag’rikeng dargoh

Bu keng dunyoda inson zotining yaralish siri aslida rang-baranglikdadir. Har bir millat — bu ulkan tarixiy dasturxonning betakror taomi, har bir til esa — Yaratganning dildan chiqqan she’ri. Biz bir osmon ostida yashaymiz, lekin har birimizning yuragimiz oʻz yulduziga qarab uradi. Aynan shu turli-tumanlikni birlikka aylantirish san’ati — bagʻrikenglik deb ataladi.

Oʻzbekiston koʻp millatli davlat boʻlib, bu erda millatlararo bagʻrikenglik davlat siyosatining ustuvor yoʻnalishlaridan biri hisoblanadi. Mamlakatda 130 dan ortiq millat va elat vakillari istiqomat qiladi. Ularning milliy madaniyatini rivojlantirish uchun Milliy Madaniy Markazlar faoliyat yuritadi.

Denov tadbirkorlik va pedagogika institutida ham 10 dan ortik millat vakillaridan iborat o‘qituvchilar va talabalar mavjud. Bagʻrikenglik gʻoyalari yosh avlod ongiga ta’lim va tarbiya orqali singdiriladi. Bizda turli millat vakillarining birga oʻqishi, ilmiy ishlar qilishi — bu tasodif emas, balki katta yutuqdir.

Har bir millat oʻz tarixi, falsafasi va bilimga boʻlgan oʻziga xos yondashuvi bilan keladi. Bu esa fikrlar xilma-xilligini yaratadi, bu esa oʻz navbatida murakkab muammolarga noan’anaviy echim topishga yordam beradi.

Bizning talabalar va oʻqituvchilarimiz uchun institut devorlari orasida kichik bir dunyo yaratilgan. Bu erda biz nafaqat darsliklardan, balki qoʻshnimizning urf-odatlaridan, bayramlaridan va tilidan ham oʻrganamiz. Bu oʻzaro boyitish jarayoni har birimizni yanada keng fikrlovchi va bagʻrikeng shaxs sifatida shakllantiradi.

Institutimizdagi hamjihatlik hech qanday rasmiy qoidalar yoki majburiyatlar bilan yaratilmagan. U yuraklarning birligi va oʻzaro hurmat asosida qurilgan, biz ham rus, ham oʻzbek, ham boshqa tillarda muloqot qilamiz. Bu tillarning har biri haqiqat va doʻstlikning kalitidir.

Joriy yilning 12-noyabr kuni Denov tadbirkorlik va pedagogika intitutida  «Bagrikenglik xaftaligi» doirasida tadbir boʻlib oʻtdi. Tadbirga  tuman hokimligi vakillari, Denov tadbirkorlik va pedagogika instituti o‘qituvchilari hamda talaba yoshlar ishtirok etdilar. Tadbirda institutning rus tili va adabiyoti kafedrasi mudiri Choriev Jo‘raqul G‘affarovich “Millatlararo muloqot: genezis, nazariya va amaliyot” nomli monografiyasi bilan ishtirokchilarni tanishtirdi.  Turli millat vakillaridan iborat talabalar esa totuvlik va bag‘rikenglik muhitining yorqin namunasi sifatida o‘zaro hurmat va do‘stlik g‘oyalarini targ‘ib etdilar.

Hamjihatlik — bu donishmandlikning eng oliy koʻrinishidir. Bizning institutimiz buni har kuni isbotlamoqda: turli rang va ovozdagi yoshlar bir maqsad — bilim olish va kelajakni qurish yoʻlida birlashgan. Biz bilamizki, bizning kuchimiz — aynan shu birlikda va doʻstlikdadir.

Denov tadbirkorlik va pedagogika instituti o’qituvchilari Xusanova S.X., Davlatova Sh.X.

Previous post Shekispir merosining zamonaviy jamiyatdagi dolzarbligi va uzoq yillik ahamiyati
Next post Gazeta — bu hujjatlashtirilgan tarix.

Добавить комментарий

Ваш адрес email не будет опубликован. Обязательные поля помечены *